२०७८ कार्त्तिक १ गते / 18th Oct 2021, Monday
investment investment

एनसिई नेपालले मुख खोल्यो : कार्बाही र सम्बन्धविच्छेदको निर्णयमाथि पुनर्विचार होस्

शिक्षाका लागि राष्ट्रिय अभियान (एनसिई) नेपालले आफू र उसको सदस्य संस्था ग्लोबल एक्सन नेपालसँग सम्बन्ध बिच्छेद गर्ने घोषणा गर्दै कानूनी कार्बाहीका लागि सम्बन्धित निकायमा लेखी पठाउने शिक्षा, विज्ञान तथा प्रविधि मन्त्रालयको निर्णयमाथि पुनर्विचार गर्न आग्रह गरेको छ ।


उच्चस्तरीय राष्ट्रिय शिक्षा आयोगका तत्कालीन बहुमत १३ सदस्यहरुद्वारा यही मंसिर १९ गते प्रतिवेदन सार्वजनिक गरिएको थियो । सो प्रतिवेदन आयोगका सदस्यहरुकै अनुरोधमा एनसिई नेपाल र ग्लोबल एक्सन नेपालले छपाईमा सहयोग गरेका थिए । दुई वर्षदेखि गुपचुपमै राखिएको सो प्रतिवेदन छापिँदा सरकारी निशाना छाप र शिक्षा मन्त्रालयको नाम पनि छापिन गएको थियो । सोही विषयलाई लिएर मन्त्रालयले यही २२ मंसिरमा एक विज्ञप्ति जारी गर्दै प्रतिवेदन छाप्ने संस्थाहरुले नेपाल सरकारको निशाना छाप र नाम ‘अनधिकृत’ रुपमा प्रयोग गरेको दोष लगाउँदै कानूनी कार्बाहीका लागि सम्बन्धित निकायमा सिफारिश र सम्बन्ध विच्छेद गरिएको घोषणा गरेको थियो । साथै, विकास साझेदारहरुलाई पनि सहकार्य नगर्नसमेत मन्त्रालयले विज्ञप्तिमा उल्लेख गरेको थियो ।


एनसिई नेपालले अध्यक्ष डिल्लीराम सुवेदीद्वारा हस्ताक्षरित एक विज्ञप्ति बिहीबार जारी गर्दै ‘आयोगको प्रतिवेदन सार्वजनिक भई यसमाथि गहिरो विमर्श होस् र यसका सकारात्मक सिफारिशहरु लागू भई मुलुकको सार्वजनिक शिक्षा प्रणालीको गुणस्तर सुधारमा थप योगदान पुगोस् भन्नेबाहेक आफ्नो कुनै मनसाय थिएन र छैन’ भनेको छ । ‘तत्कालीन आयोगका बहुमत सदस्यहरूबाट प्रतिवेदनको पिडिएफ प्रतिसहित एनसिई नेपाललाई गरेको अनुरोध स्वीकार्दै हामीले केवल छपाई कार्यमा सहयोग गरेका हौं । हाम्रो सदस्य संस्था ग्लोबल एक्सन नेपालले यस कार्यमा ऐक्यबद्धता जनाउन आंशिक योगदान गरेको हो,’ विज्ञप्तिमा भनिएको छ, ‘हामीलाई आयोगका सदस्यहरुबाट प्राप्त पिडिएफ कपीमा मन्त्रालयको नाम र निशाना छाप प्रतिवेदनको अङ्गका रूपमा रहेको र प्रतिवेदन सार्वजनिकीकरणलाई एक रचनात्मक योगदानको रुपमा लिँदै सोको नैतिक एवं कानूनी जिम्मेवारी आयोगका उल्लिखित पूर्व सदस्यहरुमै रहेको ब्यहोरा मिति २०७७/०८/२२ मा उहाँहरुबाट प्रकाशित विज्ञप्तिले नै स्पष्ट पारिसकेको छ ।’


सो संस्थाले यस कार्यमा सहयोग गर्दा कुनै प्रकारको नाफामूलक उद्देश्य नरहेको स्पष्ट पारेको छ । अनौपचारिक रुपमा यसभन्दा अघि पनि सो प्रतिवेदन मन्त्रालयको नाम र निशाना छापसहित विभिन्न सञ्चार माध्यममार्फत् सार्वजनिक भएको पनि एनसिईले प्रष्ट्याएको छ । एनसिई नेपालले प्रतिवेदन छपाईका क्रममा गल्ति भएको भए आफू क्षमाप्रार्थी रहेको र शिक्षा मन्त्रालयसँग संवाद गरेर त्यसलाई सच्याउन पनि तयार रहेको जनाएको छ । सो संस्थाले असमझदारीलाई छलफल तथा संवादबाट समाधान निकाल्न आफू प्रतिबद्ध रहेको भन्दै यसका निम्ति आवश्यक वातावरण बनाउन मन्त्रालयसमक्ष अनुरोधसमेत गरेको छ ।


शिक्षासम्बद्ध ४०९ वटा नागरिक संस्थाहरूको राष्ट्रिय कार्य समितिको हैसियतमा रहेको एनसिई नेपालले सन् २००३ देखि शिक्षाका लागि विश्वव्यापी अभियानको नेपाल च्याप्टरको रुपमा पनि काम गर्दै आएको छ । संस्थाले सार्वजनिक शिक्षाको सुदृढीकरणका निम्ति वकालत गर्दै सरकारलाई रचानात्मक सहयोग पुर्याउँदै आएको बताएको छ ।

 

प्रमुख समाचार

 सिमकार्डमार्फत् सियुजी सेवा: लक्ष्य ३४ लाख विद्यार्थीमा पुर्याउने, जोडिए ५ हजार मात्रै  सिमकार्डमार्फत् सियुजी सेवा: लक्ष्य ३४ लाख विद्यार्थीमा पुर्याउने, जोडिए ५ हजार मात्रै

सरकारले कोरोना महामारीका बेला वैकल्पिक सिकाइका लागि भन्दै ३४ लाख विद्यार्थीलाई सियुजी (क्लोज युजर ग्रुप) सेवामा जोड्ने लक्ष्य राखेपनि जम्मा ५ हजार बाल ...

‘सेल्फ सेन्सरसिप’ले कार्टुन पत्रकारिताको मर्म बच्न नसक्ने निष्कर्ष ‘सेल्फ सेन्सरसिप’ले कार्टुन पत्रकारिताको मर्म बच्न नसक्ने निष्कर्ष

‘सेल्फ सेन्सरसिप’ अर्थात् स्व–नियन्त्रणले कार्टुन पत्रकारिताको मर्म बच्न नसक्ने कार्टुनिष्ट तथा पत्रकारहरुले औंल्याएका छन् । कार्टुन ...

गुरुत्वाकर्षण न्यूटनले पत्ता लगाए भन्ने पाठ परिवर्तन हुनु पर्छ: प्रधानमन्त्री गुरुत्वाकर्षण न्यूटनले पत्ता लगाए भन्ने पाठ परिवर्तन हुनु पर्छ: प्रधानमन्त्री

प्रधानमन्त्री केपी शर्मा ओलीले गुरुत्वाकर्षणको सिद्धान्त पश्चिमा वैज्ञानिक सर आइज्याक न्यूटनभन्दा पनि अघि पूर्वीय विद्वान तथा गणितज्ञ भाष्काराचार्यले ...